Ti Koze ak Afro Alice : NNP – Bezwen Esansyèl Tout Po Figi

Ase souvan gen nan nou ki toujou ap mande kisa m fè pou po m bèl konsa. Jodiya, rete branche pou m pataje ak nou kèk ti sekrè tou senp pou nou kenbe po nou byen bèl.

Nou te deja pale de NNP pou swen cheve.  Men, eske nap sezi sim di nou menm sekrè swen pou cheve a ki se NNP a valab pou swen po tou? Ou ta renmen konn kouman. Vin suiv….

Premye N nan NNP a se pou Netwaye. Koman li aplike nan swen pou figi.

Ou bezwen netwaye figi w le w lave l ak yon savon oswa netwayan ki fèt pou sa (se pa savon santi bon ou benyen avèl la non) de a twa fwa pa jou chak jou. (Mwen m itilize netwayan pou figi Neutrogena. Sa pèmèt figi w pwop epi pare pou l resevwa sa w ap aplike sou li yo.

Ou bezwen eksfolye po w tou sa vle di retire tout ekse po ki mouri, pwodui ki te rete, elatriye. Mwen itilize eksfolyan Neutrogena a oswa avwan melanje ak myèl pou m fè sa de fwa pa semèn.

Ou ka fè pwop savon w oswa eksfolyan w pou pow. Nan yon lot diskisyon na ba w reset pouw fe savon natirel ou.

Dezyèm N nan NNP a se Nouri. Men koman li valab nan swen figi tou.

Lèw idrate figi w chak jou, li revitalize po a, li fè li byen dous, epi li nouril. Anvan w aplike makiyaj, li enpotan pou w fe sa. (Etandone po figim sèk m itilize krèm idratan Pond’s ki ble a. M konn itilize luil zanmann ak luil kokoye tou).

Le w fin eksfolye po a oswa retire makiyaj, itilize yon tonifyan pou ki kalme po a, li repare l epi li diminye iritasyon po a. (M itilize likid tonifyan Neutrogena a oswa dlo flè roz pou sa)

Toujou kenbe nan tèt w, ou ka fè tout pwodui pou w sevi ou menm lakay ou ak engredyan natirèl.

Dènye lèt nan NNP a se P ki se Pwoteje. Koman w ka pwoteje po w?

1- Fè mas ak labou, ak ajil, ak lot engredyan anko pou w nouri l epi pwoteje l kont anviwonman an (soley, dlo lanme, pousye, elatriye). M achte mas ki tou prepare oswa mwen fe pwop mas mwen.

2- Le w ap idratel, itilize yon pwodui pou ki pwoteje l de reyon soley la ( Depi m konnen map ekspoze nan soley san pran souf pou plis ke 15 minit, m konn aplike yon krèm ki gen faktè pwoteksyon SPF 45 osw aplis)

3- Le w demakiye ou pwoteje po w kont vyeyisman two bone, kont bakteri ak kont bouton paske figi w gen ekse pwodui ki rete ladan. M itilize demakiyan St Yves la, swa pa Neutrogena a oswa luil kokoye.

M sot pale nou de tout sa m fè kom swen pa deyo pou ki fe po m bel epi rete bel, men rete de bagay m poko di nou ki lakoz sa:

1- Gen sam manje
2- Gen jenetik

Sam manje:

Le w gad foto a w panse se chiko! LOL. Se kawot. Depi m piti m te toujou gen po ki sansib, kawot se te toujou youn nan pi bon zanmim. E se youn nan sekre pou ki pemet po m ret bel. Mwen manje 5 grenn kawot bebe chak jou (depi m pa bliye). Bonjan vitamin A ki gen ladann ede m kenbe bel po m.

Mpa neglije manje ki gen fè(sos pwa nwa, elatriye), ki gen vitamin E ak vitamin D. Gen bagay mwen pa renmen manje, m pran yo sou fom vitamin tankou m pa renmen pwason. Grasa vitamin ki gen luil pwason yo, kom kontinye byen nouri epi po m ret byen bel.

Yon lot bagay anko seke m pa neglije bwe dlo. Dlo netwaye kow, li baw yon ekla. Po w ap plise tankou hotdog ki te fri si w pa renmen bwe dlo! M bwe anpil dlo.

De lot bagay ke map travay sou yo ki pemet po rete bel tou se spo ak domi.

Jenetik

Si w we malgre efo w fe, po w pa egzakteman jan w ta swete l la, asime epi renmen po pa w la ak sa ki fel inik. Tout moun pa gen menm tip po. Jenetik jwe gwo wol nan sa. E nan ka pam, premye bagay ki fem gen po m genyen an se paske m gen menm po ak manmanm. E pesonn pa ka chanje jenetik.

Kelkeswa po w genyen an, pran swen l.

Annie, Afro Alice

NNP- Bezwen Esansyèl Tout Kalite Cheve Natirèl

Nou tout gen cheve nou natirèl men nou pa gen menm stil cheve, ni cheve nou pa gen menm istwa, bezwen menm kalite swen men gen twa bagay ke tout cheve nèt bezwen ke l te grenn, kel te siwo. Ekip Afro Alice la rezime sa tout cheve bezwen nan twa mo ki fome yon konsèp: N-N-P. Kisa NNP vle di? Ki fason pratik yon moun ka konsidere konsèp sa yon fason pou yo pran swen cheve yo byen pou li ka ansante, pouse epi byen bèl?

N-N-P rezime sa tout kalite cheve bezwen pou yo rete ansante, bèl epi pouse e li vle di Netwaye / Nouri / Pwoteje cheve w. Pou w rive fe sa, sa mande lanmou ak pasyans. Ann dekotike chak grenn lèt yo.

N-NETWAYE

Pou cheve w ansante, fok li netwaye. Netwaye cheve w gen ladan:

1- Sote pwent cheve w- yon fason pou pwent ki tchaktchak yo pa mare lot branch cheve w epi kase yo epi pou cheve w ka pi djanm

2- Eksfolye epi klarifye po tèt w- yon fason pou w retire tout salte, ekse pwodui ak selil ki mouri nan po tet la pou k la byen pran lè sitou le w fin fe yon penyen ki te bouche po tet ou oswa ki pat two pemet ou byen lavel

3- Lave cheve w- Pou w retire kras, swe, pousyè, lot salte ak ekse pwodui nan cheve w, fok w lave yo chak semèn ak chanpou oswa netwayan ou itilize ki apwopriye pou w fe sa.

Eske NETWAYE cheve se pa yon bagay tout moun dwe fe ke w gen cheve siwo, grenn? Ke cheve w long oswa kout? Ke cheve w ansante oswa bezwen amelyore?

Nou tout dako TOUT MOUN AK CHEVE NATIREL bezwen NETWAYE cheve yo.

Pa janm sispann netwaye chevew.

N- NOURI

Pou cheve w ansante, bel epi grandi fok li manje (oui fok ou nouri l). Nouri cheve gen de pati:

1- Nouri cheve w pa anndan
“Cortex” se dezyem kouch cheve w e li responsab pwopriyete ak briyans cheve w. Pi bon kote pou w komanse travay pou cheve w bel e byen fome se nan manjew paske anplis de jenetik se sa w manje jan w viv ki pemet cheve w gen bon pwopriyete epi soti nan po tet ou djanm. Depi cheve w fin kite po tet la, ou PA KA CHANJE PWOPRIYETE cheve w yo, kidonk. jan w manje, bwe, domi, fe spo, jere laviw gen enpak sou chevew. Pou cheve w bel fok ou konn sa w dwe manje ak sa w dwe retire nan alimantasyon w.

2- Nouri cheve w pa deyo
Cheve w bezwen idratasyon ak pwoteyin pou l rete djanm pa deyo.
Premye bagay cheve w bezwen pou l bel djanm se dlo. Cheve w menmjan ak yon plant, depi l pa jwenn dlo, li red, li sek, li pret pou kase. Se komsi cheve w boude paske w pa bal manje. Toujou idrate cheve w. Cheve w bezwen bonjan pwoteyin tou pou li rete djanm epi gen fos. Se balans de bagay sa yo kap fe w konseve longe cheve w omaksimom pandan tout faz devlopman cheve w la. Pou wkonn ki vale idratasyon ak pwoteyin cheve w bezwe, tès sou cheve mouye ak tes powozite ap ede w. PA NEGLIJE pran swen chevew. Yon ti benduil, yon ti dlo, yon ti masaj fè yon diferans! Fe efo a, ou pap regret

P- PWOTEJE

Cheve pase twa faz nan lavi l, pou w prezeve l plis nan faz devlopman an e pou w ka sere maksimom longè pandan tout sik lavi cheve w yo, fok w pwoteje yo. Cheve w bezwen de tip pwoteksyon:

1- Pwoteksyon kont yon seri bagay nan anviwonman an tankou reyon solèy yo, pousyè, fredi, imidite, sèl lanmè, dlo klowoks, dlo ki gen kalkè, dlo pisin. Menmjan w pase krèm pou ki bloke reyon solèy yo le w pral ekspoze lontan nan soley la, menmjan tou gen krem ak luil pou ki fe sa pou cheve w yo. Lanati, jaden w ak kizin ou gen bonjan solisyon pou ede w pwoteje bel ti cheve w yo.

2- Pwoteksyon kont bagay ou itilize pou w fe stil men ki ka koute w longè, bote ak sante cheve w. Chalè ki depase 155 degre Celsius nan fè, nan sechwa, elatriye domaje lyezon pwoteyin cheve nou yo e sa pa ka repare. Penyen sere oswa rale cheve yo jiskaske yo soti ak tout pye(bulbe en francais), kite cheve yo mare jiskaske w pa ka jwenn bout yo anko, domi ak yo tou lage epi san yon bonè oswa yon sak zorye ki fet pou sa, itilize pwodui ki plen engredyan ki pa bon pou sante cheve w(koulè ki pa apwopriye pou cheve yo pa egzanp), move abitid tankou toujou ap rale cheve (hand in hair syndrome ann angle) se selman kek nan bagay ki ka fe w fin redi fe cheve w yo vini epi se wou anko ki pa pwoteje yo ase ki fe yo pral tonbe. Bagay ki di lew fin pase yon lane, de lane ap pran swen chevew, yo bel, yo founi, yo klere epi yo ansante. Epi pou tet yon chalè fè ki twop, yo komanse tonbe!

Si w pa pwoteje chevew, netwaye ak nouri w te nouri yo a se te lave men siye atè.

Cheve ki long, ki ansante, ki klere epi bèl pa maji! Li don men li gen efo tou ladan e nou garanti w kelkeswa tip cheve w genyen an, kelkeswa moun ou ye, si w pratike N-N-P, cheve w yo ap grandi, yap bel epi yap long. Eseye epi wa bannou nouvel.

Ak cheve natirel, ou bel grasa ‪#‎NNP‬ sou baz lanmou ak pasyans.

Annie Christine Emilcar

Afro Alice

Alopesi – Sak Lakoz li Ak Jan l ka Trete

Anpil moun konn kontakte nou pou mande koman yo ka jwenn solisyon pou de bo tèt yo k ap kale oswa chit yo genyen nan lot kote nan cheve yo, se vre nou ede moun sa yo le nou ba yo bon konsey oswa menm mande yo we yon dematolog le sa vreman grav men se lotrejou nap konprann a ki pwen pwoblem sa se yon pwoblem ki ap fe kenken kay medam yo. Se sak fe li enpotan pou nou pataje kek enfomasyon ak konsey ak nou tout, yon fason pou nou ka fe prevansyon oswa tretman pwoblem sa. Nou pral pale de alopesi : sal ye, kisa ki lakoz epi kijan nou ka evite oswa trete l ?

Alopesi se mo doktè ak moun ki nan sektè sante a itilize pou TOUT chit cheve. Li nomal pou nou pedi 100 a 150 cheve chak jou e le sa rive li pa yon pwoblèm. Tout cheve ki tonbe pi plis ke sa se yon chit e se sa yo rele alopesi a.

Alopesi konjenital se alopesi ou mwens rankontre.  Lè yon moun gen fom alopesi sa, cheve pa pouse nan rasin tèt la ditou e cheve pa rive soti paske gen anomali nan jan cheve yo fome a.  Cheve yo PAP JANM pouse kidonk se sel gref cheve ki solisyon le yon moun gen alopesi konjenital.

Alopesi akoz sikatris se le w pedi cheve konpletman nan yon kote nan tet ou gen yon mak paske w te fe yon gwo aksidan, ou te gen yon gwo blese, ou te gen yon maladi grav tankou loupous oswa  w te boule. Cheve yo PAP JANM pouse anko kidonk   pi bon solisyon an se gref cheve.

Alopesi andwojenetik se sa nou rele an jeneral moun ki chov la. Se vre nou we li pi vizib kay gason men li rive fi tou. Li jenetik epi pou w genyen l fok gen sa nan fanmi w. Li rive le timoun nan laj pou fome, ogmantasyon omonn degrade po tet la epi fe cheve yo grandi mwens amezi ane ap pase. Etandone fi gen pi bon ekilib nan omon yo, se selman 25 % fi ki konn gen pwoblem chov. Le gason chov, yo gen tandans pedi cheve devan tet la ak nan mitan tet la. Le fi chov, cheve nan mitan tet yo klèseme tikras pa tikras. Finosteride, Minoxidil ak enplantasyon cheve se solisyon pou moun ki chov.

Alopesi distribiye, sa yo rele effluvium telogene nan se le ou gen plizye kote nan tet ou k ap pedi cheve. Stres oswa manje mal oswa radyoterapi oswa kimyoterapi oswa yon enfeksyon oswa akouchman oswa sezon ka lakoz sa. Gendwa se yon medikaman wap pran oswa yon pwoblem nan tiwoyid oswa nan metabolism ou ki lakoz sa tou. Pou w trete alopesi sa, li enpotan pou w idantifye kiyes nan bagay sa yo ki lakoz li. Kou w trete sak lakoz li a, cheve a sipoze repouse.

Alopesi aerata sa yo rele pelad la se le w gen kote byen spesifik nan tet la kote wap pedi cheve epi yo fe yon seri de twou ki plizoumwen gwo. Se pwoblem nan sistem iminitè ki konn lakoz li. Stres ka lakoz li tou. Piske sa gen rapo ak sistem kow , li bon pou w we yon doktè pou ki preskriw sa ki ap ede cheve a repran manm epi pwoblem nan trete

Ou ka lakoz ou pedi cheve tou si w pa manje byen, ou pa domi byen, wap mennen yon vi ki stresew, ou pa idrate kow ase, ou manke vitamin, ou penyen sere oswa w penyen chou tout tan oswa grèf tout tan ka lakoz ou fè chit cheve. Lè sa, fo w idantifye ki sak fe sa epi itilize bon ti pwodui pou cheve natirel ki ka edew.

Grasa bon lanmou ak swen ou ba yo, yap regrandi anko.